உங்கள் மனைவிக்கு பிறந்தநாளா? என்ன பரிசு கொடுத்து அசத்தலாம் என்று தலையைப் பிய்த்துக் கொண்டிருக்கிறீர்

உங்கள் மனைவிக்கு பிறந்தநாளா? என்ன பரிசு கொடுத்து அசத்தலாம் என்று தலையைப் பிய்த்துக் கொண்டிருக்கிறீர்களா?

மனைவிக்கு பிறந்தநாள் வருகிறது என்றால் ஒரு வாரத்திற்கு முன்பே தனது வாழ்க்கை துணைக்கு என்ன பரிசு கொடுக்கலாம் என்று ஆராயத் துவங்கி விடுவார்கள். அவரவர் வசதிக்கேற்ப மனைவியின் பிறந்தநாளைக் கொண்டாட திட்டமிடுவார்கள்.

என்ன பரிசு கொடுக்கலாம், மனைவியை எப்படி குஷிப்படுத்தலாம் என்பது குறித்து சில டிப்ஸ்கள்...

1. மனைவிக்கு பிடித்த கலரில் புடவை வாங்கிக் கொடுத்து அசத்தலாம்.

2. கொஞ்சம் டப்பு உள்ள ஆளா நீங்கள். தங்கம் அல்லது வைர நகையை பரிசளிக்கலாம்.

3. நள்ளிரவு 12 மணிக்கு சர்பிரைஸாக கேக் வெட்டி இன்ப அதிர்ச்சி கொடுக்கலாம்.

4. அன்றைய நாள் ஆபீசுக்கு லீவு போட்டுவிட்டு மனைவியுடன் வெளியே சென்று வரலாம்.

5. பிறந்நாளன்று மனைவிக்குப் பிடித்த உணவை நீங்களே சமைத்து ஊட்டிவிடலாம். (சாப்பிடற மாதிரி இருந்தா...)?

6. உங்கள் மனைவிக்கு வெளியே போக மனமில்லை என்றால் நீங்கள் இருவரமாக வீட்டில் இருந்து பழைய நினைவுகளை அசைபோடலாம். முக்கிய குறிப்பு: இனிய அனுபவங்களை மட்டும் அசைபோடுங்கள்.

7. அன்றைய நாள் முழுவதும் உங்கள் அரவணைப்பில் வாழ்க்கைத் துணை திளைக்கட்டும்.

8. நீ தான் சிறந்த மனைவி என்று ஒரு வாழ்த்து அட்டையைக் கொடுத்து மகிழ்விக்கலாம்.

9. நீங்கள் விலை உயர்ந்த பரிசுப் பொருட்கள் கொடுக்க வேண்டும் என்றில்லை, நெற்றியில் பாசத்துடன் ஒரு முத்தம் கொடுத்தால் கூட அதுவே பெரிய பரிசாகும்.

10. மல்லிகைக்கு மயங்காத பெண்ணும் உண்டோ. உங்கள் கையால் மல்லிகைப் பூ வாங்கி அதை அவர் தலையில் வைத்துவிடுங்கள். அப்புறம் பாருங்கள் அன்பின் மிகுதியை.

மேற்கூறியவை சின்னச் சின்ன ஆலோசனை தான். நீங்கதான் பெரிய புத்திசாலியாச்சே, இதை விட சிறப்பாக கூட உங்களுக்குத் தோணலாம். பிறகென்ன அதையும் செய்து பாருங்க..

மனைவியை காதலிப்பது எப்படி?

கணவனின் பாதி தான் மனைவி. அப்படிப்பட்ட மனைவியைக் காதலிப்பது எப்படி என்று பார்ப்போமா.

தினமும் காலையில் எழுந்ததில் இருந்து இரவு தூங்கப் போவதற்கு முன்பு வரை பம்பரமாய் சுழலும் மனைவிக்கு ஒரு நாள் ஓய்வு கொடுங்கள். வீட்டு வேலைகளை நீங்கள் செய்து அசத்துங்கள். நீங்கள் அவ்வாறு பெயருக்கு சொன்னால் கூட வேணாமுங்க, வாரம் முழுவதும் ஓயாது உழைக்கிறீங்க. சனி, ஞாயிறு நிம்மதியா ஓய்வு எடுங்க, வீட்டு வேலைகளை நான் பார்த்துக்கிறேன் என்று சொல்லி உங்களை வேலை செய்யவிடமாட்டார்.

அது தான் மனைவியே சொல்லியாச்சுல நாம் போய் கால் மேல காலப்போட்டு டிவி பார்ப்போம் என்று சென்றுவிடாதீர்கள். நீயும் தான கண்ணு தினமும் உழைக்கிற இன்னைக்கு ஒரு நாள் ரெஸ்ட் எடு என்று சொல்லி வீட்டு வேலைகளைச் செய்யுங்கள். மனைவி உச்சி குளிர்ந்து போவார்.

எதிர்பாராத நேரத்தில் கட்டித் தழுவி அன்பாக ஒரு முத்தம் கொடுங்கள். ஆஹா, என் புருஷனுக்கு என் மேல் எவ்வளவு பாசம் என்று பூரித்துப் போய்விடுவார். திடீர் என்று ஏதாவது ஒரு பரிசு கொடுத்து அசத்துங்கள். மனைவி வேலைக்கு செல்பவரா? அவரை ஊக்குவியுங்கள். அதனால் அவர் இன்னும் திறமையாக பணிபுரிவார். அலுவலகப் பிரச்சனைகளைக் கூறினால் முடிந்தால் தீர்வு காண உதவுங்கள்.

மனைவியை மனதாரப் பாராட்டுங்கள். அது அவரின் தன்னம்பிக்கையை அதிகப்படுத்தும். இயற்கை எழில் கொஞ்சும் இடங்களுக்கு அழைத்துச் செல்லுங்கள். அங்கு சிலு, சிலுவென்று காற்று வீசுகையில் மனைவியின் காதருகில் சென்று ஐ லவ் யூ என்று சொல்லுங்கள். அவர் பதில் சொல்லாமல் புன்னகை புரிந்தால். ஐ லவ் யூ சொன்னால் லவ் யூ டூ என்று சொல்ல வேண்டும் என்று கூறுங்கள்.

டிவி பார்க்கையில் எப்பொழுதுமே உங்களுக்கு பிடித்த சேனல்களை மட்டும் பார்க்காதீர்கள். உங்கள் மனைவிக்கு பிடித்த சேனலை வைத்து இருவரும் சேர்ந்து பாருங்கள். (நாங்க எங்க எங்களுக்கு பிடித்த சேனல் பார்க்கிறோம், எப்ப பார்த்தாலும் சீரியல் தான் ஓடுகிறது என்று நீங்கள் சொல்வது கேட்கிறது)

இரவு நேரத்தில் நிலா வெளிச்சத்தில் மொட்டை மாடியில் அமர்ந்து மனம் விட்டு பேசுங்கள்.

நீங்கள் எப்பொழுது அவரை முதன்முதலாகப் பார்த்தீர்கள். நிச்சயதார்த்தத்தில் எப்படி ஓரக்கண்ணால் பார்த்தீர்கள், திருமணத்தில் உங்கள் மனைவி எப்படி வெட்கப்பட்டு தலைகுனிந்தபடி நின்றார், குழந்தை பிறந்தபோது எப்படி உணர்ந்தீர்கள் என்பது போன்று பேசுங்கள். இதெல்லாம் எத்தனை தடவை பேசினாலும் அலுக்காத ஆனந்த விஷயங்கள்.